Per tè u mare, puesia di l'Ambruscu

Per tè u mare
Chè tù feghji à l’orizonte
Forse ti pare
Di travarcà un ponte?
Per mè hè u mare di l’urfanellu
Chì s’hà purtatu ladrone
I dui nipoti è u so fratellu
Ch’ellu secchi stu vulpone!
Per mè u mare hè l’abbissu
Induve perdu u cerbellu
E feghju u sgardu fissu
U volu stancu d’un acellu
Per mè u mare hè sprufondu
E ci chjocca un sonu ribellu
Induv’ellu si purtarà vagabondu
L’ansciu di u mio battellu?
Per mè u mare hè vangone
Di l’angosce scurdate
Ancu s’eo girgu u timone
Sò petricelle suminate
Per mè u mare hè una tela
Un’artistu à u so travagliu
Ogni tantu ci passa una vela
Capu d’opara mare d’ogliu
Per mè u mare hè veculu ch’ananna
U rimenu di e maree chjare
E a luna si rimira in a pampana
Di e vigne à nantu à e sarre
Per mè u mare hè l’incertezza
Di l’ambate mosse cun frenesia
Birbanti in cerca di prudezza
Per compie altiere a so via
Per mè u mare hè libecciu infuriatu
Chì si ruzzinca e so ripe
E lascia u so fiancu marturiatu
Da le murditure infinite
Per mè u mare hè trattu silenziosu
Chì porta sperenze à longu andà
Induve sbuccia marosu misteriosu
Quand’ellu nasce à l’alburighjà?
Per mè u mare hè puntile sulignu
Chì s’affoca ghjuntu l’estate
Ma s’eo ci passu l’inguernu malignu
Si ralegra di le sponde calmate
Per mè u mare hè l’archettu sicuru
Chì face trimà e corde di a musa
Quand’ellu passa da chjaru à scuru
S’accende la mio anima dilusa
Per mè u mare hè un spechju di sole
L’arcubalenu a manechja
D’un spurtellu chì vi conta fole
Senza avè ne una techja
Per mè u mare hè l’erba marina
Chì rutula à nantu à e culette
Cotuli gutuppati di lana
Tribulate forme mai strutte
Per mè u mare hè un bancone
Scalatu quì da l’Italia vicina
Chì s’impacienta à sulleone
Nimu ùn si calà nant’à mo crina?
Per mè u mare hè sognu di rena
Dimenticanza in i to bracci
Tù sai tumbà l’affannu è a pena
Immurtalità chè tù mi lasci
U mare à l’entre di issu mondu
Era cum’ellu serà dumane
E mi ne ridu solu giocondu
Di le vostre sentenze vane
L’ambruscu
 
 

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *