Acqua vergugnosa, puesia di Mimi Corteggiani

 
Fideghja u mare
Ma altrimentu
U sole chì pichja
Ma ellu ùn trema
 
Venutu da luntanu
In un battellu maladettu
Ùn avia chè trè anni
Trè anni di straziera
 
U capu nant’à l’acqua
Acqua vergugnosa
Per ste dimucrazie
farze umanità
 
Pertutu di paesi
Circhendu a libertà
mandati quì
Anghjuli persi
 
sti ritratti
Facenu u giru di u mondu
scume di lacrime
Sbacchendu i cori
 
U capu nant’ à l’acqua
Acqua scema d’indifferenza
Tombanu tanti fiori
Lascendu fà, lingue secche
 
Di sta ghjuventù indugliata
Chì ni fermerà
Tante offese a vita
Cume un diu pò lascià fà
 
U capu faccia à u sole
Aylan, Petru, Amed o David sò pertuti
Crepa core, sole chì perde i so lumi
Per quelli ch’anu da campà.
 
U capu nant’à a terra
Tanti nucenti si ne sò andati
Traditi da un mondu dettu civilizatu
Spugliati di st’amore
R
U capu fattu di stelle
C’era un nostr’ avvene
Trimentu sò e mente
È discita e cuscenze
R
O mare di lacrime
Accoglie in un amore celestu
I zitelli marturiati
Abbracciendu incù dulcezza è calore
i cori di st’anime
 
 
 
 

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *