NUVEMBRE, puesia

par Jean-Marc Riccini
In lu celu di dolu, correnu i nuli
Smarriti e rondine e le rise zitelline
Tempu di I Santi, tempu nuvembrinu
Mette l’ànima e lu core à l’addisperu .
A natura si piatta e principia a tremulà
Suffia lu ventu e sbattuleghja l’albeta.
U tettu grisgiu, teghju di piuvicinata
Fa pienghje e so teghje di malincunia.
U tonu tremendu risponde a l’abbaghju
E straccia cu l’accendite la notte chi vene.
I chjassi muntagnuli vestidi di cuscogliule
Si perdenu soli in lu bughju ghjalatu.
Cu l’ària piaghjinca si move la fumaccia,
Ricubrandu u paese chi infine s’addrumenta.
Principianu li sogni di u veranu luntanu,
Lamentu di tristezza, lamentu d’inguernu.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *