Pace è Salute, U Sallichju

Pace è Salute,

Quand’ùn scriveraghju più per nimu
Eiu scriveraghju sempre per tè
Hè venutu lu tempu ci simu
Dammi la to manuccia per piacè

L’affanni d’un mondu scimunitu
Chì trascura ogni resistenza
Issu sguardu zitellinu smaritu
Averemu noi a pacienza ?

E mode cambiarine da l’annu
L’essare persu à giritondu
Malticente critiche passanu
Cum’è u tonnu furibondu

L’indernu spazza nant’à i tetti
U sole di e prime rumanze
Precoci distacchi maladetti
Quì si cumpieranu l’ignuranze

Mille dumande senza risposte
Si strughjenu in i cicaleghji
Tant’altre d’ùn esse ancu poste
Aspettanu piatte in l’arreghji

E rivolte stanche di fiurisce
Inghjalullite ghjuntu u vaghjime
Troppu à l’infuria per gradisce
Ne stanu sorde di issu mughjime

Solu di pettu à l’universu
Mi lasciu piglià da l’abbacinu
Ma in lu to pettu capu persu
Ci vogliu dorme cum’un cininu

Guarda chì splende in a bughjura
Una casa aperta à quattru venti
Un trema soda luciula chjara
Chì s’appiccica à li to stenti

C’entreranu e fole smarite
E l’usi persi di l’altru mondu
Attagnata da parà e lite
Piglierà un versu più fecondu

E la piuma ch’avia lasciatu
Lamperà torna l’inchjostru neru
Per cuntà issu mondu disgraziatu
A chì ci vole crede da veru

      U Sallichju

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *