C’era un sumere chì si chjamava Marchese, cunniscite voi un sumere
incu cusì bellu nome ? U patrone dicia :
“S’è agrottu un Marchese ind’è à mo stalla, allora sò conte o puru
barone” !
Allora vi scrivaraghju qualchi parolla innantu à u libracciolu : ” u sumere
Marchese”.
C’ era ind’u paesolu “induve e case eranu culore azuru lavanda è giallu
paglia è e muntagne à l’intornu, cuperte di fiori è d’arburi” una bella
zitelluccia : Saveria.
Ma SAVERIA era trista, mancu à pena felice, era arfagna é una cucina
era vinuta à campa in casa soia.
Gattiva sughjetta sta cucina : ladra, bugiarda, ingorda, l’avia tutte, é a
povera Saveria era diventata à risa di i zitelli di u paese : i paisani,
niscetri, cridianu a cucina.
SAVERIA era sola di fronte à tutti, ma un ghjornu chì i zitellacci vulianu
piglialla à petrate, u sumere Marchese avanzò è si misse dananzu à
SAVERIA per prutege la.
Ciò chi i paisani ùn avianu capitu, Marchese ellu avia l’avia capita. Avia
capitu e suffrenze di à zitelluccia.
É da tandu u sumere Marchese hé diventatu per SAVERIA un amicu
sinceru. Si ritruvanu à spessu per girandulà in paese.
Un vi cuntaraghju micca a fine di sta fole. À voi di leghje u sumere
Marchese scrittu da Hélène Suzzoni, adattu in corsu da
Marianghjula Antonetti Orsoni cù i disegni d’Aurélie Da Coletto, tutte à
trè moltifiche . Sta bella storia ci face tene caru i nostri sumerelli un pocu
spariti da i nostri paesi.
Si tratta di una fola publicata da Canope. Fù un piacè tamantu di leghje a
storia di Saveria è di u sumere Marchese !
Hè un racontu chì s’indirrizza di più à i zitelli ma piace dinu à i maio.
Hé dinu una manera di fa leghje a lingua corsa à i zitelli.
Intruti ch’omu hè ind’issa sturietta, si hà subitu a voglia di cunnosce à
seguita è ghjè un veru piacè di seguità e passate di i nostri dui amicacci.
A lingua corsa di Marianghjula hé scietta, pura, fiurita é si leghje cusi bé.
Allora o Zité, per cunnosce sta bella fola
U sumere Marchese
v’aspetta.

Laisser un commentaire

Votre adresse e-mail ne sera pas publiée. Les champs obligatoires sont indiqués avec *