Scontru literariu di u 21 di marzu , U Royal, in Bastia

Avemu ripigliatu u corsu di i scontri Literatura in caffè stu mercuri sera.
Invitati, autori è participanti, ci simu trovi à 8 ore è mezu in Bastia. L’accolta di u Royal, carrughju Campinchi, hà participatu à u piacè di sti 2 ore di scambii, cù a simpatia di a squadra di u stabilimentu ind’un locu accugliente (ci pudete truvà ancu frittelle di casgiu fresche fresche !).

A nostra stonda hà principiatu cù appena di tristezza ma assai affettu. Anne-Marie ci hà parlatu di Jean-Raphaël Cervoni, autore passiunatu di Storia è di a Corsica, un amicu di Musanostra smaritu di Ghjenaghju.
per leghje l’omagiu di Marianne Laliman https://assomusanostra.wordpress.com/2018/02/09/jean-raphael-cervoni-cet-ami-trop-tot-parti/
Lucia hà iniziatu un omagiu à Ghjanterramu Rocchi è datu a parolla à Ghjuvan Ghjaseppu Franchi chì ci hà parlatu di l’omu è di u pueta, di quellu chì sterà per noi tutti a fiura di l’impegnu creativu per a lingua.

Sempre in leia cù a vulintà di trasmette, ma di manera più alegra, i nostri invitati, Paul Turchi-Duriani è Fabien Mariani ci anu prisentatu Pirrù è Ricuccata, u so bellu travagliu creativu è cullaburativu in lingua corsa destinatu à i zitelli –ma mancU appena interdettu à i maiò !

U libru cù u so CD, risultatu d’un riccu è longu prugettu, deveria esse u primu d’una seria cù listessi persunagi principali chì, dopu à Bastia, purteranu i so lettori in parechji lochi di Corsica.

Marie-Jo Rossi era ghjunta di Balagna pè parlacci di 2 libri : Novella Urtaca sottu a direzzione di Santu Massiani

è  di U cantu di l’arburu

Cù Marie-Luce avemu scupertu Sorte ingrata, un rumanzu in francese..
Ci hà prisentatu dinù 2 libri in Corsu : l’ultimu  di Lisandru de Zerbi : Messa è Canti nustrali
Sorte Ingrata, di  Marie Madeleine Poli-Bonifaci

è « U contu di mille è unu Motti »è l’ultima opera di Ghjiseppu Turchini.

A bella racolta di puesie di Patriziu Croce è Antone Ghjiseppu Salviani, À Passi minuti, illustrata cù pitture è disegni di l’autori hè stata cummintata da Anne-Marie.

A nostra chjachjarata hà seguitatu u filu di a curiosità di i participanti, da un blog pueticu, Fior d’acciaghju, mintuvatu da Carulina, à u ghjocu video Winterfall chì hà da aduprà u Corsu è ch’ellu pripara Fab Mariani, o Géographie d’un adultère  (A Riva, Gallimard ), prisentatu da Jean-Marc  Riccini, pè compie sta bella serata di scuperta è di scambiu.

« GEOGRAPHIE D’UN ADULTERE »
Agnès RIVA
(L’Arbalète Gallimard)
« Ema è Paul so maritati è affigliolati. Travaglianu in lu stessu scagnu. Principianu una rilazione adulterina. Amore diffesu, amore piattu.
Seguiteremu stu coppiu tra lochi strani : a cucina di Ema, a vittura di Paul, u so scagnu, acantu à una capella a sera, à l’ostella. Agnès Riva ci porta in unu « road trip » adulterinu tra i carrughji di a cità, una giugraffia particulara.
Ema inamurata scema serà dillusa da a vigliacchina di Paul. Si ritrova un schema propiu à stu gèneru di rilazione. Cum’è di solitu l’omu ùn vulerà micca lascià a so moglia è i so figlioli. Si cumpierà a rilazione.
Un modu di scrive direttu, sèmplice, Agnès Riva ci dà un primu rumanzu, senza pratesa, ma aggradèvule à leghje. » (G. M.  Riccini)

                                                                                                                 Marianne Laliman