Libri prisentati u 30 di maghju in Bastia Livres présentés le 30 mai 2018 à Bastia

Le dossier Félix Decori, Albiana 2018
Lecture de Marianne Laliman

Aviamu u piacè di riceve à Ghjacumu Fusina, ghjuntu à parlacci di u so ultimu libru, Le dossier Felix Decori. U rumanzu ci conta a scuperta -è si pò ancu parlà d’inchiesta- ch’elli facenu i persunagi di Jean è Marie nant’à un terzu persunagiu, storicu questu quì, Felix Decori.

I dui giuvanotti, innamurati è chì stanu inseme da pocu in Parigi, si sò visti rigalà da un amicu una publicazione di a currispundenza di G. Sand è Alfred de Musset editata da Felix Decori, avucatu pariginu ricunnisciutu è d’origine corsa.
Incuriusiti è passiunati di literatura, Jean è Marie cercanu di sapenne di più nant’à Decori è, attempu, di capì a rilazione ch’uniscia à Sand è Musset, ch’elli provanu d’analisà in ribombu cù i so propii sintimi.
Femu u passa è veni trà l’amore di i scrittori è a vita di Decori è ghjè cusì chì u libru prupone à u lettore una scuperta -scuperta in ribattu- di a vita literaria in Parigi à 2 epiche : quella di Sand è Musset è quella di Decori, à u principiu di u vintesimu seculu.
Seguitendu l’interrugazione di i dui persunagi è e so ricerche, amparemu elementi precisi di a storia literaria è di manera più larga culturale, ma ancu di a storia pulitica, chì Felix Decori hà occupatu una pusizione vicina di u putere, in particulare à u mumentu di a prima guerra mundiale.
Pudiamu suppone chì u rumanzu era statu custruitu cù u risultatu di ricerche fatte da l’autore ellu stessu, chì a curiosità di Jean è Marie era ancu a soia.
È ghjè ciò chì l’avemu dumandatu di cunfirmacci. E spiegazione di Ghjacumu Fusina ci anu permessu di capì cum’ellu s’hè assestatu u prugettu di stu libru, natu di u so interessu pè u persunagiu di Decori è pè a vita culturale parigina.