Par Ghjacumu Fusina

Jean-Louis Giovannoni hè unu di quelli chì contanu in u paisaghju oghjincu di a puesia di spressione francese.
M’era fermata impressa a so prima racolta Garder le mort in u 1975 causa d’una qualità di voce è certi tratti cum’è di casa chì avianu toccu l’isulanu pariginu ch’o era eo tandu : chì u pueta vene difatti di a nostra isula, propiu di u Casacconi è di u Rustinu.
A racolta si pigliò di sicuru una bella nomina postu ch’ella hè stata reeditata parechje volte è ancu una recente in u 2009 arricchita d’un prefaziu di Bernard Noël ! U nostru pueta, ricevutu qualchì annu fà da i liceani di Montesoru è da l’associu Musanostra cù u so publicu di lettori, hè un omu ghjentile chì ritruvava cun piacè i paesi di a so isula è a cità di Bastia duv’ellu avia scorsu una parte di a so giuventù. Palisava d’altronde d’ùn essesi mai scurdatu di u corsu ch’ella li parlava a mammone, è ch’ellu u capia sempre ancu si a pratica currente li mancava.

Cuncisione assai, ricerca di l’essenziale, ecunumia maiò di i mezi spressivi puderia caratterizà a scrittura puetica di Giovannoni cunforma cusì à una orientazione forte di a spressione puetica oghjinca. U libru ch’ellu prisentava quì titulatu Voyages à Saint-Maur ùn hè micca una racolta di puesia ma invece un racontu stagliatu in dodeci « viaghji » in un quartieru in riva di Marne di a cità duv’ellu hè vissutu zitellu è duv’ella stede assai a mamma. Ma megliu chè e descrizzioni classiche o l’evucazioni liriche li piacenu di più nutazioni corte, ritagli, pezzi di memoria, riflessioni ch’ellu avia zitellu à buleghju à osservazioni d’oghje, nant’à i paisaghji di e sponde o l’architettura citatina, permanenze o mudifiche, à partesi da rari documenti, ritrattini o ricordi di zitellina, l’inseme essendu rivittulitu da u rituale d’issi ritorni. L’osservatore si primura tandu di e vite minutucce, animali o vegetali, è prusegue ogni tantu e so scuperte cù una documentazione fine chì raghjunghje i soliti mendi zitellini è u so raportu cù a scrizzione passata di e cose.

A e sfughjite numerose chì purrebbinu scumudà u so lettore issu narratore particulare oppone qualchì quadru fissu o a ripetizione listessa di certi elementi, a ligna di i carri, i nomi di i carrughji, i so numeri significativi…chì cuntribuiscenu à l’unità fundia di u racontu. I liceani anu interrugatu l’autore nant’à a quistione generica trà racontu è puesia, è l’hà rispostu cù semplicitai è pedagugia dicenduli quant’ellu tenia à a messa in valore d’ogni minuzia à spessu scurdata, invece porta ella sensu è verità. Dice trattendusi di u so libru chì « i zitelli escenu certe volte da u ritrattinu –troppu à u strettu- è dopu hè troppu immensu ». Manera metaforica è ghjusta di spiecà cusì chì in coda di certi capituli « viaghji » di u libru puema brevi è essenziali lucenu pianu pianu.

(Jean-Louis Giovannoni, Voyages à Saint-Maur, récit, Champ Vallon éditeur, 2004) 


Laisser un commentaire

Votre adresse e-mail ne sera pas publiée. Les champs obligatoires sont indiqués avec *