Pirru è Ricuccata sò di ritornu pè novi avventure !

Ritruvate Pirru è Ricuccata, libri musicali cù i so dischetti, per i zitelli (è i grandi dinù) !

Scrittu da : Marianne Laliman

Hà da esse publicatu u quintu tomu di Pirru è Ricuccata, l’Ochju di a luna.
S’aspetta di dicembre, appuntu pè Natale. Bona nutizia pè tutti quelli à chì li piace à rigalà libri à i zitelli. È libri cum’è quessi sò rigali belli è preziosi. Di quelli chì cunghjucanu in veru u piacè è
l’utilità, u core è a ragiò. Bella sigura, e storie sò propiu adatte pè i zitelli. L’aspettu ludicu ci hè, e peripezie danu u ritimu, ci sò persunagi simbolichi, pusitivi è negativi, u surrisu è a risa ùn mancanu mai è ci hè ancu un suppulu di spiritu pueticu. E fiure sò originale è piacevule, i libri sò
accumpagnati da un CD è ci hè ancu un’appiecazione dispunibule. Ùn manca nunda pè seduce è incantà u publicu zitellescu oghjincu.

Ma l’odissea di l’orsu è a topa in cerca di u so Graal, u Cornu sacru, serà forse quella di i so criatori è diventa quella di u lettore chì, un libru dopu à l’altru, si face scuperta è splurazione di a natura è di i lochi, di a dimenzione culturale è ancu di e varietà linguistiche. U scopu pedagogicu hè palesu : si sente un travagliu di ricerca è di riflessione pè a cuncezzione di e storie è ogni avventura hè arricchita cù pagine di prisentazione è di spiegazione nant’à l’animali, i lochi è a so storia. È tuttu què senza fà nè troppu seriu nè pisivu u racontu. Serà què a più bella prova di riescita di sta seria di storie, ciò chì permette di ricunnosce una creazione di qualità pè i zitelli : pruponeli libretti chì divertinu, fenduli imaginà, risente è amparà attempu.

Da leghje ancu : Les statuts très particuliers de Paul Turchi-Duriani

Mudernità è cultura

È ogni tantu ci truvemu rifarenze chì parlanu à i lettori menu giovani, cum’è un cennu d’ochju à i (bravi!) parenti chì facenu a lettura à ifiglioli.
Bellu esempiu di ciò ch’ella pò fà a creatività di una squadra sana pè assucià mudernità è cultura, pè risponde à a larga gamma di i bisogni di a zitellina, da u bisognu d’amparà à quellu di sunnià.

Vecu avà, à a fine di stu bigliettu, ch’ùn aghju dettu nunda, o guasi, nant’à a lingua!
Pirru è Ricuccata sò libri scritti in corsu. A sapemu ch’elli sò scritti in corsu, è ghjè impurtante
ch’elle ci sianu e publicazione in corsu pè i zitelli, ci rallegra ogni volta chè no ne truvemu una, iè.
Ebbè, ùn ci pensava mancu più à quessu l’aspettu. Belli libri pè i zitelli scritti in lingua corsa chì si
leghjenu cum’è belli libri scritti in un altra lingua, senza pensacci ma piglienduci listessu piacè, ùn hè riescita, ancu què?