Affichage : 1 - 3 sur 3 RÉSULTATS
Articles

Yekîneyên Parastina Jin', puesia corsa di L'Ambrascu

1280px-cap_corse-tours_genoises
Cum’è un anghjulu smaritu
Nant’à i to vintidui anni
I vigliacchi t’anu traditu
Da sbrugliatti cun li to lagni
L’affogu natu à le to porte
L’abbottu da tutti in cità
Pienghje a to gattiva sorte
Ma lasciatti more quallà
E fiure à u televisore
U mezzaru nant’à e spalle
Ti vecu ogni sera à ott’ore
Trà u pevaru è u sale
Risalta tandu u curagiu
A quattru mila chilometri
Vulè forse, ùn avè l’asgiu
Vergogna daret’à i vetri
E case punti illuminati
Acciucciate cum’è piulelli
Da tantu impegni infrulliti
Lascialle andà à macelli
Tù chì ingolli a polvera
Donna fatta è mufrogna
Di rimenu per a bandera
Bellu fiore chì si spanna
I canti eranu allegri
Chjamanu oghje u rimbeccu
Sò nati rimproveri acri
U sguardu torna murtalescu
Ghjace per isse prigione funeste
Furzata è straziata da l’omi
Ci n’hè nazione pocu oneste
Chì anu cunsumatu i sogni
Un fucile in manu sguassa
U to surrisu à l’onde chjare
S’affiachisce framente passa
Una culomba sopr’à e sarre

Articles

A l'acquale mutescu, puesia di L'Ambrascu

A l’acquale mutescu
Parcorsu di vita
Un’alzu à lu frescu
Di pace infinita
U fustu arradicatu
Allungava e so rame
A lu celu spurgulatu
E lucia u frundame
Sottu à u ponte anticu
Di guazza dilicata
Un passerottu timicu
In a nepita cutrata
Si piattava à l’aggrottu
Di lu ventu scatinatu
Un era parnicottu
Cun la mamma appullatu
In u vechju casgile
Ammantatu di lellera
Appicatu un fusgile
Incù la so carchera
Una fattoghja di ghjuncu
In un scornu sepellita
Di latte sempre u muscu
Una vistica rimita
Davanti à u musuleu
U cateru rughjinosu
Spalancava ghjuvellu
A l’usciu di u riposu
E fronde di u vaghjime
Umide passata l’acquata
Un mantellu di cuncime
Sopr’à a terra sacrata
Addossu à a muraglia
L’aciartula ghjacia
A nantu à ogni scaglia
U sole risplendia
Un busginellu battia l’ale
A chjoppula iridata
Maestosu batellu à vele
Paria una vetrata
Piazza di lu paese
Hè sunatu u murtoriu
Duie curone appese
Portanu u curdogliu
Una cascia di suvara
Hà travarcatu u zigliare
Tutti a tenianu cara
Si chjamava Leia mi pare
 

Articles

Bonghjornu o madamicella… L'ambrascu, Puesia

thW8Z7VWA6
Bonghjornu o madamicella
Vi lasciu l’ultime strufate
Un sò cumu hè truvarete
Isse rime o cara zitella
Forse v’arricurderete
D’un zitellu impacente
Chì purtava a so fede
In u core di a ghjente
Tocca avà di cambià l’ora
S’apprunterà l’inguernu
A faccia ùn hè più mora
U sole spunta indernu
S’ellu ùn vole più cantà u ghjallu
Durmendu in u so nidu pagnu
U scuzzuleraghju per svegliallu
Quant’è ch’ellu fussi u veranu
Mi sentu torna infrebbatu
Averaghju un gattivu male
U ventu soffia più cutratu
Un ci hè medecina chì vale
A dilla franca site voi
Chì fate strazià u mo core
L’avia sappiuta dapoi
Ch’ellu hè crisciutu l’amore
Un sò pueta ma a musa
Mi porta à l’usu Pampasgiolu
A mina trema vergugnosa
Di ritruvavvi cun curdogliu
Pare ch’ellu hè u più garbatu
Di i paesi per quelle sarre
Eiu viaghju sempre scalzatu
Ancu per salutà u sgiò merre
Bellu sguardu è denti bianchi
Sò fisiche di i maligni
Per burlà ùn sò mai stanchi
Ma di l’amore pocu degni
Sò falatu in Aiacciu
A cumprammi dui panni
D’un esse più puvaracciu
Guarisce da li mio danni
Dicenu chì site maritata
Purtate una criatura
Vi pregu una vita beata
E d’ùn chjappà mai puntura
Mi ne voltu in a valla
A truvà una Minicola
Chì l’amore scunsulatu
Trova sempre u so rifiatu
 
L’ambrascu