20150607_121335
 
A mo vittura (Ghjuvan Lucca Luciani, maghju 2015)
Aghju una vittura eiu
Chì si face rimarcà
Un si trova la sumiglia
Pudete puru circà
L’astri ne parlanu assai
Eu a vogliu canzunà.
Si piglia tutti li venti
U freddu li dà a tossa
Una pitricella in tarra
Causeghja tanta scossa
S’eo penciuleghju à u chjerchju
Sò discitatu pè forza.
Si trova tutta inchjaccata
E porta tutti li frisgi
Pare travagliu di vacche
Pare travagliu di misgi
Certe volte pensu anch’eiu :
Ohimè quant’è tù sdici !
Un possu fà cum’è certi
Chì e prumenanu fieri
Nanzu prisintava bè
Oghje ùn hè più quella d’eri
Prumittia sei cavalli
Un vale più trè sumeri.
Di cio ch’ella ghjera nanzu
Un ci dà più tante prove
Ma ancu per esse vechja
Siguita tutte e mode
Piglia tutti i culori
Sicondu cio chì ci piove.
Fatta pè vince a corsa
Di quella chì và più pianu
Viaghja barbuttulendu
E si sente da luntanu
Mette paura à l’acelli
E ancu à qualchì cristianu.
A doppianu tutte quante
Ma ùn le guarda mancu più ne
Passanu tutte lustrate
Quant’elle facenu fume !
Ci anu lampatu i patroni
Tutta l’acqua di u fiume.
Cunnosce lu cuntinente
Ma in Corsica s’hè avvezza
In tantu in tantu ind’è e girate
Ci sumena qualchì pezza
Per tutti li garagisti
Riprisenta una richezza.
S’eo a portu à u cuntrollu
I lumi giranu rossi
Mi ci vole à caccià i soldi
Senz’avè d’astri ricorsi
Per tutti ssi vechji « screux »
Un facenu tanti sforzi.
7
Par’ chella sia surtita
Di u campu di battaglia
Porta fiera e so ferite
Di rughjinosa farraglia
Un le piatta cù a tinta
Chì ghjè franca è nun ci sbaglia.
Un mi dumandate più ne
« Ohimè ! Cum’ai fattu ? »
A ch’ùn li piace i frisgi
Girghi l’ochji è stia ciattu
Eu fin’tantu ch’ella dura
Per un antra un l’abarattu !
Per ludà la mio vittura
Mettu lu spirtu è lu core
Ancu s’ella ùn s’aspittava
A ricoglie tantu onore
Eu sò fieru di cantà :
Ch’ellu evivi u mutore !
 
20150607_121345
 

Laisser un commentaire

Votre adresse e-mail ne sera pas publiée. Les champs obligatoires sont indiqués avec *