Qualchì anni fà, Dorothy Carrington pensava chì u mazzerismu pudia smarisce.
Perchè a vita materialista d’oghje suprana pianu pianu certi valori tramandati da i nostri antinati. I corsi di tandu avìanu una vita interiore d’una richezza tremenda !
A trasmissione di sti valori, di sta vita psìscica tradiziunale corsa, ùn s’hè micca fatta o puchissimu …
Serebbe bè di ramentà o d’amparà à quelli chì ùn la sanu micca o chì si nè sò scurdati, ciò ch’ellu hè u Mazzerismu.
Hè ciò ch’ellu hà pruvatu à fà Ghjuvan’Micheli Weber cù u so libru « Cuntrastu cù un Mazzeru ».
Stu diàlugu hè una manera originale di fà connosce sta fiura di u nostru incuscente cullettivu è ancu di l’ànima corsa. Eppo stu scontru vole dì soprattuttu chì i mazzeri esìstenu sempre.
Ma cumu si pò fà per ricunnosce un Mazzeru ?
« S’è tu guardi l’ochji, ùn ti poi sbaglià ! ».
L’omu hà sempre vulsutu sapè ciò chì si passa à l’al’di là è hà sempre circatu à entre in u campu di a trascendenza.
In lu nostru imaginàriu corsu, ci hè un esse chì batte stu campu da l’antiluna : Hè quellu chì và à i cunfini trà u nostru mondu è l’altru mondu.
Ùn ghjè micca un « chaman » ! Un hà pudere. Hè qualchissia chì obbidisce à una chjama, à certe voce chì sò in l’ària.
Ma sà, dopu à so càccia, qualè chì hà da more in paese. Hè un cacciadore di l’ànime. Hà una funzione.
Frà e riposte di l’omu, ritruvemu tutti l’aspetti di u Mazzerismu ch’è no cunniscimu.
Ritruvemu i sonnii, a chjama, a càccia, u locu, l’acqua, l’animale ammazzatu, A Squadra d’Arozza è a Lèia cù quelli chì sò spariti …
U Mazzeru, à spessu, hè statu vistu, à tortu, cum’è un tumbadore.
« Un aghju tombu à nimu ! Aghju tombu un animale chì era a so ànima. Aghju favurizatu u passaghju in l’altru mondu ! »
Avemu, in pettu à noi, un omu serenu chì hà a so filusuffia pròpria è una certa nubiltà. Mette in anda u sensu, a capacità di sente.
Quellu chì hà stu donu pò esse Mazzeru !
« Tuttu u mondu pò esse mazzeru ! Ghjuntu à una certa riflissione, basta à vulè ! »
Què, hè un sìntimu importante. Sente è sapè capì ciò chì hè in giru à noi, l’energia chì sbocca da un locu, da a Terra, da a Terra Corsa perchè u mazzerismu hè qualcosa ch’ùn si trova ch’ind’è noi !
Cercà sempre à capisce i so sonnii, à da li un sensu.
Ma per esse capace d’avè sti sìntimi, ci vole à pensà cum’è elli pensàvanu i nostri antenati chì campàvanu siconti e règule nustrale.
Micca quelle d’oghje, di i citadini, di a pensata ùnica : « Listessi vestiti, listesse vòglie, listesse dumande ! »
Ancu di gràzia chì l’autori cum’è Ghjuvan M.Weber ammèntanu quale sò è nostre ràdiche !
Perde sti valore vole dì perde ciò ch’è no simu noi, tuttu ciò ch’ hà fattu un Populu, a Terra Nostra.
Ghjè un libru da testimòniu, un mezu di trasmissione …
GM Riccini
En savoir plus sur Musanostra
Abonnez-vous pour recevoir les derniers articles par e-mail.