Fiori di machja. Petru Santu Leca, C. Luzi Ed. Albiana 2018

Recension de P. Alibertini, traduite par C Campana

Trad. di Cathy Campana

Petru Santu Leca hè unu di i più grandi poeti corsi.
U libru « Petru Santu Leca » di Cristofanu Luzi , ed. Albiana u face scopre. Stu poeta, d’Arbori, à a discrezione legendaria, hè l’autore di e famose canzone,  » Sottu à u ponte » è  » Ti tengu cara « .

Hè statu professore di talianu prima in Corsica è dopu in Nizza. Si n’hè mortu in Nizza à 72 anni. Petru Santu Leca era nipote carnale di u grande Santu Casanova è cugnatu di Paul Arrighi, u fundatore di u Centru di Studii Corsi in Echisi.

Avia un amicu caru, Paul Valery, d’origine corsu da u babbu. Stu libru di Cristofanu Luzi ci rigala qualchì belle lettere trà i dui poeti. Petru Santu Leca hè statu direttore di  » l’Annu corsu » è fondatore di a rivista litteraria mediterrania » L’Aloès ».
A so collezzione era spapersa ma Cristofanu Luzi ( dottore es lettere, ingeniore di ricerca CNRS à l’università di Corsica Pasquale Paoli) s’hè fattu un dovere sacru di ricapizzala. Dopu a scuperta di certi quaderni è carte inedite,hà ghjudicatu chì st’opera meritava una ricunuscenza più grande. Hè cusì ch’hà publicatu testi corsi versificati è ancu in prosa. Omu scopre tandu un’opera di qualità, un’opera corsa, dilicata è classica, moderna ma tradiziunale, incù i tema prediletti di a natura, a morte, u tempu chì passa…

Cristofanu Luzi hà misuratu u valore di Petru Santu Leca, di quale a Corsica s’era scordata, forse per via di a so umilità. Vole chì st’opera, veru patrimoniu litterale corsu, sia infine ricunisciuta. Incù finezza, si serve di a Ricerca per mette in manu di tutti l’opera cumpleta di st’autore corsu di prima trinca. Per prisentà l’opera di Petru Santu Leca è u so studiu criticu, Cristofanu Luzi hà fattu u giru di a Corsica ma dinò di e biblioteche è centri d’archivi di Francia cuntinentale.

Ch’ellu sia ringraziatu per stu bellu travagliu chì permette a spartera di u Capitale corsu.