Affichage : 1 - 11 sur 11 RÉSULTATS
Articles

Bonghjornu, puesia

U Sallichju

Bonghjornu,

Arriccamà un pezzucciu
D’una stofa lacerata
O piantà un arburucciu
In a terra marturiata

Pone l’inchjostru schjaritu
Nant’à un incalcu neru
Vede ch’ellu ùn hè svanitu
U to impegnu sinceru

Caccià e cavezze lene
Di e facce azzittate
E spiccicà e catene
Di le mani aggrunchjate

Quant’ellu pò fà un omu
Pè un avvene sebbiatu
D’un carratteru indomu
Porta celu spurgulatu

Rialzà ogni petruccia
E accuncià un casellu
Zuccà indè issa casuccia
U castagnu d’un purtellu

Cum’è le crine sudate
A chì vince u so pane
Isse strazie ùn sò rubate
S’arrizzanu ogni mane

Inventà per l’altra leva
U rinnovu operaghju
Avè sempre ‘nu l’idea
D’esse ghjustu un vercaghju

Quant’ellu pò fà un omu
Pè un avvene sebbiatu
D’un carratteru indomu
Porta celu spurgulatu

Sbanì ogni gustu aspru
D’una lingua minacciosa
Chì ci porta à u disastru
Ch’ella sia vergugnosa

Un serà u vigliaccone
Chì tomba per dui soldi
Neppuru u lazarone
A furà si scarpi novi

Circheme di mantene lu
U pugnu strittu pisatu
Cum’ellu facia ellu
Capu à capu indiatu

Quant’ellu pò fà un omu
Pè un avvene sebbiatu
D’un carratteru indomu
Porta celu spurgulatu

                               c
Articles

Sradicata, puesia di U Sallichju

              Sradicata

Puesia di U Sallichju

U sguardu persu in a to casetta

Aspetti issi parenti ch’ùn vulteranu

Tandu si ciarlava sopr’à a piazzetta

Oghje murmureghja u ventu terranu

Issa zia chì falava spessu a sera

Di l’alte muntagne tucchendu a luna

Quandu di notte si vultula a terra

In pianu un fucarellu si cunsuma

Un cuginu chè tù chjamave fratellu

Da poch’età cun lu so core sinceru

U corciu ùn hè più vultatu manch’ellu

E ghjochi sola cù lu to addisperu

Issa surella di latte affezziunata

Cumpagna paisana di ghjorni stanti

Cunfidente muta di a spassighjata

Quand’elli s’arreghjanu i corpi stanchi

U cumpare scalatu à sbunurata

E lu so sumerellu alegrachjinu

Ellu chì ti facia una risata

Per scunghjurà u passatempu mischinu

Sradicata in paese furesteru

Quand’ellu minaccia l’esiliu eternu

Ti ramenti un mumentu effemeru

Chì ti ricaccia un pocu di l’infernu

Ma chì pazzie di l’essare umanu

U ponu purtà nant’à issa gattivera

Campà à u so latu chì disingannu

Eppuru ci nasce sempre una spera

U Sallichju

Articles

Un ghjornu di partenza

par U Sallichju

Un sò chì richezza purtà ti 

Ma ti deraghju l’inchjostru per scrive 

Ti fermeranu i ritratti

E sintimi chè t’ùn poi trascrive

Un possu esse a to barca

Ma seraghju u ventu chì scuzzula

In mare a valisgia carca

E tutte e ramintenze ch’ellu spula

S’è tù voli girà u mondu

Lasceraghju a mo porta aperta

Viaghja da cima in fondu

Fà puru pruvista d’ogni scuperta

Un sò guarisce i turmenti

Ma aghju l’abbracciata pronta per tè

Truvà à scunghjurà i pienti

Senza mai palisà u mo parè

Un sò mancu dà cunsiglii

Per cunsulà e lacrime asciutte

Di lindumani di bisbiglii

Circà di truvà e parolle ghjuste

Ma s’è tù voli lasciu corre

E mi scanteraghju da i to passi

Lasciu a mo passione more

M’alluntaneraghju da i to chjassi

Un sò induvinà l’avvene

E primurà e scosse da l’azzardu

Teatru cun parechje scene

Induve ùn si sà purtà u sguardu

S’è tù trovi in d’altri paesi

Issa piazza chè tù ricercave tantu

Apri i dui bracci stesi

Si maestra di issu mondu frantu

Quandu hè ghjornu di partenza

Trima l’incertezza di a seguita

Di issu ghjocu avè cuscenza

E dassi curragiu in a fughjita

                     

Articles

A fola di u sallichju cun a capinera- par. U Sallichju

Bonasera
capinera.
Pigliu à lu volu risulutu
E rispondu anch’eiu chjuccutu
A a vostra pensata nutturna
Ma ùn allungheraghju a funa

Quale mi parla ? Disse quella….

A bona sorte
felice notte.
In u sunnià d’altri paesi
Chjese cun campanili accesi
Prufumi, marine in l’Italia
Anderemu s’ella ci hè a voglia

Quale mi parla? Disse quella….

Bonghjornu
frastornu.
Orizonti bughji à lu pensà
Esse o ùn esse qual’è chì sà ?
A ripete è sente prumesse
Si sgranelanu sempre e listesse

Quale mi parla? Disse quella….

Bon’appitittu
Ne sò afflittu
U sallichju perde u cerbellu
Un manghja più chè noce, nucelle
Per esse più arceghju è bellu
Ma travaglia e so riturnelle

Quale mi parla? Disse quella….

Bona ghjurnata
voi stimata.
Cun tutti sti libri ch’aghju lettu
Cercu i versi per fà l’effettu
Acconciu rime à modu meiu
Facciu l’inchinu cù galateu

Quale mi parla? Disse quella….

Da u chjuchjulime à l’appiattu
Cantava più ch’ellu ne facia.
Ella ùn hè robba à bon pattu
Li garba pocu issa fantasia:
«Vi lasciu per l’Africa luntana
S’è ùn trovu cappiu chì mi para
Nè amore, parolla inderna,
Viaghju più altu chè la sarra ».

Induve site? Disse quellu…..

Pichja puru cun stu vechju fustu
A perdene u to cerbelletu
Trapana cun u bizzicu frustu
T’intesti à cantà acelettu
Spuli u tempu in grammatica
Ma ne ai persu a pratica

U Sallichju

Articles

S'è tù t'inventi , puesia di U Sallichju

S’è tù t’inventi un celu chjaru
Viderai chì a luna ride anch’ella
E to sperenze un sognu caru
Puru campà vita mischinella
Duve luce u sole d’estate
Chì t’abbagliuleghja da lu so guardu
Monda ghjente fine di serate
Ritruvà la sola per azardu
Indè cert’appossi di furtuna
Ci sò ancu lumi artificiali
Ghjente gattiva chì t’impurtuna
Chè l’ùn t’accadessi di scuntralli
Perde in le lumere di feste
Arcubaleni di culori accesi
Per cacciassi isse intime funeste
Briachine di giravì appesi
Ma s’eo ti facciu apre l’alba
A mità di ghjurnata aghjacchita
Rasserinà ti calà a frebba
Carezza a to pella incrispita
Ampareremu à dumà ragi
E rinnuvà cert’idee cadute
Tramindui avè issi curagi
Quelle brame ferme è risulute
A rombu di celu spurgulatu
Viderai chì a luna ride anch’ella
Vuleria stà à u to latu
Puru campà vita mischinella
U Sallichju

Articles

A bufeghja, scritta da U Sallichju

Bonghjornu, una nova per a rientrata.
A bufeghja
Mi sò arramintatu eri sera
E to dite pichjendu a tastera
A bufeghja di a sigaretta
Stantarava soffice è lesta
Quand’e to dituccie ballerine
Facianu l’acelle pichjarine
T’ai la bocca fina, scalpellata
For di mondu è mai liata
Chì dice chjaramente lu s’avisu
E ch’ùn lascia piazza à l’impruvisu
Di le to labbre si fughje tepidu
Un’alitu densu è languidu
T’ai lu pettu calurosu è sodu
Induve l’amante gode l’esodu
In a sheza tetra di a camisgia
Un dissegnu di dentella grisgia
Quattru pichjine tenenu l’intrata
Induve porghju a brama sperata
T’ai l’ochji ingordi chì ciottanu
In e pagine word di u screnu
Una ciuffa di capelli sculigna
Chè tù acconci cun una mina
Un’ansciata attippa in sulaghju
Si ne fughje per u lucernaghju
U ghjattu cuttighja a tarantula
A stuzzica sgualtr’à vultulella
Un ragnulu in a tilatica
Cura paziente la mastarucula
L’odore aspru di u tabaccu
Pichjitta in lu mio capu fiaccu
Un vedi e sfiere di u riloghju
E noi tramindui indè st’alloghju
Un vedi la mio bocca assetata
Chì briona silenziu aghjacchita
E lu fume biancu puzzicosu
Hà impestatu issu locu ascosu
 

Articles

E lu to soffiu corre in e sepe puesia di U Sallichju

E lu to soffiu corre in e sepe
 
Pensacci torna nanzu di parte
E vultacci cun l’ochji chjosi
Murmucinà è ghjucà l’anfarte
Nantu à l’erbaghji calurosi
Carezzà a crina d’un elpale
Da pendite in creste sulcate
Nuli rossi sopra à u serrale
Capanne, torre inalpacate
L’abbozzu d’una forma arceghja
Scappaticcia in a nebbia pagna
Pienta, volta, s’avvicineghja
Ma in u celu chjirla l’altagna
Arrimbassi à l’ochji sereni
Tempii pruvisti di fuculate
Chì seguitavanu e mo mani
Cusì nascenu l’amurichjate
Vuculà in e ricciate scure
Ch’allunsigavanu i spasseghji
I gesti offerti in e bughjure
E volte, scurtoni di l’assaghji
Arrubbà un pezzu di ricordu
A issi muri grisgi scalcinati
Di pett’à lu tempurale sordu
Chì guasta l’amori ghjustu nati
U tempu quì face un’arretta
L’eternu si vultula per lentà
Una petruccia tonda chì salta
Gira, gira, ùn si vole piantà
Eppuru ci vulteraghju torna
A vede l’acque sfundà e ripe
U sognu incertu d’una donna
E lu to soffiu corre in e sepe
 
 

Articles

E cose di l'amore…Puesia di U Sallichju, à quelli chì campanu pueti à quelli chì si sò amati

Torna e cose di l’amore chì frastornanu quant’è a puesia.
I capatoghji di scrive puemi è d’amà à qualchissia s’intreccianu.
E passione ùn lascianu a pace.
 
Un sò più quand’ellu serà natu
Di ghjornu o notte pocu impreme
Ghjunse timicu u serinatu
Guasi guasi ùn lu sentu geme
Un seranu più forme muderne
E scelte di scrive puesie
Ridicule cose anticogne
Vechje ragane è fantesie
Ma mi venenu solu e rime
E d’altri modi mi scappanu
Vede al dilà varcà e cime
E scalà in un mondu arcanu
Andà à buscà ciò chì ci piace
Serebbe ancu troppu arditu
Per gode una vita in pace
Hè megliu d’ùn esse smisuratu
Ma ùn si sceglienu e passione
E i turmenti ch’elle portanu
Un si tratta di cumprumissione
Quandu dui cori s’inchjoccanu
Per vultà quì à lu mio sughjettu
Diceraghju ch’eo ci pensu sempre
Ch’elle mi fermeranu in pettu
E stonde gradite ogni mentre
Parolle sottuvoce smelate
Nasconde sicreti cunnisciuti
Stanu muti di le so campate
Quelli chì sò stati namurati
U tempu ùn hè più ammaestratu
Quand’ellu si sminticheghja l’ore
Caccia u pesu sprupusitatu
Di u perchè campà è po more
 
D’ùn vulè cascà in a trappula
Di l’eluquenza cun manerette
Piantu subitu a diciulella
E compieraghju le strufette
 
Perchè ghjera eiu è ghjere tù
Perchè ùn ci cuntavamu fole
Pruvature tremende di virtù
Illusione vane o scusarelle
 
 
 
 

Articles

Eppuru sò spruvistu, puesia, U Sallichju

 
Aghju pigliatu à lu ventu
U so soffiu impetuosu
Quellu d’un focu mai spentu
Di rusta accesa è estrosu
Imprestammi caru zighinu
A sbunurata innucenza
A u principiu di lu ghjornu
Quandu li cappia a pazienza
E vistu ancu un russignolu
Cun lu so versu armuniosu
U cumpreraghju per un soldu
Ch’ellu spunta celu radiosu
 
U sole serà dinù prontu
A dammi le so spere chjare
Quandu seremu d’accusentu
Vogliu abbagliacà e sarre
 
In l’acqua di issu fiumicellu
Limpida cun la petra matticia
Ci arrubò cum’è un zitellu
A grazia d’una fata dancia
Lu to silenziu pratelettu
Serà per mè u riposu
U mio rifiatu predilettu
Di punt’à lu mondu ritrosu
Ma cumu hè chì sò spruvistu
Aghju scruccatu à la natura
Tutti l’ingenii ch’aghju vistu
E aghju torna a primura
Mi manca forse una cosa
Mignulella è dispettosa
U basgiu snellu chè tù mandi
A l’innamurati tremendi
 

Articles

«Pizzicu minicu di nati naticu….» Puesia di U sallichju

Per mammona di l’Oretu è u pueta Ghjuvanteramu
A rivecu pusata à l’umbria
Quand’ellu si pisava u ghjornu
E cun la so pala ripunia
U pane scaldatu di u fornu
A rivecu torna à la sulana
Murmucinà ci quattru strufate
Di e parolle d’una nannanna
Qualchi volta appena scurdate
I passi muti à l’incertezza scura
Facianu risaltà a memoria
Dopu si ricalava di più sicura
Ripigliendu u filu di a so storia
Sott’à una pergula duve a vigna
Ricupria cun e so rame sticchite
A travata di la so umbriccia pagna
Sculavanu l’ore, stonde infinite
A trifuna di u pizzicu minicu
Saltichjava à nantu à e dece dite
E nostre rise sincere per stu ghjocu
Puntellavanu ghjurnate cumpiite
Cun lu to vestitu tuttu di neru
E li to capelli intrecciati
Chì sbarsavanu da u mezaru
Sopr’à i to ochji inchjuculiti
Cun le to mani agrunchjate
Accasgiulendu i to figliulini
Cum’e radicelle sparguliate
Per fà ricrese li novi pulloni
Ere tù la nostra fata
A to voce chì tramanda
Mammona mai scurdata
Hè lu core chì cumanda
                                                                                        U sallichju
 

Articles

U chjarore svanitu, puesia di U Sallichju

 
Cercu lu sole chì spampilla in li to ochji
E l’ambria imbasalmata da li finochji
Spigarelle in i to capelli sciolti
Da l’arietta ghjucarina scunvolti
Cercu la carezza à lu primu ragiu natu
Sottu à linzoli duve l’amore inzercatu
S’è svoltu in u sudore di corpi abbracciati
A lu soffiu caldu di dui amanti afferrati
Cercu à lu primu esiliu la to manu
Quella chì amasgiuleghja da luntanu
Stesa per li cori svaniti è dilasciati
A l’arice sfracicate di sonnii pruibiti
Cercu a rivolta in u to pugnu alzatu
Da mantene puru ciò chì fù revucatu
Un rimbeccu in a to bocca aperta
Lampà sfide à l’upinione esperta
Cercu le stonde dilicate à lu meziornu
E li girasoli chì ballanu à l’intornu
E piumuccie di pernice in u to collu
A nantu un lettu fattu, un nidu frollu
Cercu in a to bocca a briachina pazza
Chì si scorda di l’inguernata scalza
Cun la so frebba guasi aghjumpatu
Mi ralegru di lu to morsu pizzicatu
Cercu di mantene daretu à u velu
U primu sguardu, u primu spasseghju
E di pratende d’ùn esse tuntarellu
Di crede ch’ellu pò durà l’asseghju
Cercu di scrive scunsulatu
A lu primu fioccu cascatu
Daretu à un vetru cannatu
U chjarore si serà svanitu?
Basgiammi torna à la rivolta
Basgiammi torna anc’una volta
Cun li mio bracci ti tengu arritta
Ch’è t’ùn cagliessi è fermi zitta
Ch’ellu mi sente stridà più forte
Quellu chì pò cambià a sorte
Quellu chì pò burlà a morte
E rallungà vite troppu corte
U sallichju
 
 
Ce que nous laissent parfois les livres
Que l’on resserre sur nous lentement
Au bonheur consommé d’être ivres
De paresse comme un enchantement
Les silences deviennent mélodies
Que l’on reprend joyeux en sifflotant
Aux accents changeants de la prosodie
La mélopée des heureux fainéants
Ce que contient un livre c’est un univers
Où les fous apparaissent souvent les plus sages
Où les gens de bien ne font pas tant de manières
Fourbu de l’éternel désir inassouvi
Je referme un livre qui traverse les âges
Et le repose ici sur sa tranche de vie