Nous vous proposons un poème, U rè di l’alturaghja, écrit par un jeune auteur Francescu Angeleri.
Nant’à l’elpe è le scugliere
È quelli alpestri pentoni
Cù le so alme altiere
S’innalzanu li mufroni.
Sì l’animale scantatu
D’ogni civilizazione,
Bramendu liberu statu
Sì fama d’una Nazione.
Arrembatu à le to zenne
agguattu in un gruttone
Ùn t’anu messu e tintenne
Chì impetti a sottumissione.
Ricantu
Cù lu to fiatu ribellu
Nù le creste sgualtru è snellu
Nimu ti pò impastughjà
L’estru toiu hè Libertà.
Saltarinu maestosu
Da l’elpali à prati erbosi
Batti l’aria, batti focu
In cerca di lochi ascosi.
Sì lu guerrieru cunvintu
Chì ricusa lu rinchinu,
Baldanzosu è distintu
Sì maestru d’un destinu.
In l’andatura tremenda
D’un oppressu indumatu
Ci reggi, sola lighjenda
Da Bavella à Tafunatu.
Ricantu
Cù lu to fiatu ribellu
Nù le creste sgualtru è snellu
Nimu ti pò impastughjà
L’estru toiu hè Libertà.
En savoir plus sur Musanostra
Abonnez-vous pour recevoir les derniers articles par e-mail.