U Sallichju esplora u mitu di a bella Ondina in una puesia delicata.

Da : U Sallichju

A leghjenda d’Ondina

Quella ondina farfalla

A chì colla à chì fala

Si spechja in a vadina

Quella belluccia ondina

I so sogni si sò persi

Cù li cotuli immersi

In fondu di issu guaglinu

Tribulatu è mischinu

Passò quì un pescadore

Cunfessatu peccatore

Di ceppu fattu umanu

Chì cunnosce bè l’ingannu

Ma l’ondina hè nucente

S’innamore d’u birbente

Omu di pocu valore

Prufita di lu s’amore

Li face purtà fagotti

O caccià li i pidochji

Travagliendu à straziera

Trapassò da la stantera

Figliuccia di a natura

A chì u ventu murmura

Ciò chì u predicatore

Chjama sdegnosu rimore

Tù ninfa di e funtane

A l’ora di e caldane

Francati da u cristianu

Chì ghjastema u paganu

Tene una religione

Ch’ùn face cumprumissione

E si scorda di u ventu

Chì ughjula u to pientu

Corre oghje issa vadina

Di e lacrime d’Ondina

                                      U Sallichju

Da leghje ancu : A fola di u sallichju cun a capinera

Laisser un commentaire

Votre adresse e-mail ne sera pas publiée. Les champs obligatoires sont indiqués avec *