A so santa cruciata

par  U Sallichju

A so santa cruciata

Ventu in poppa, accendite, timpesta
Carriavanu mughji di furia mossa
Tendone colmu ghjunghjenu à a lesta
Ascultà quellu chì chjama à la riscossa

Ellu lampa ogni parolla sculpita
Di terra marturiata sin’à l’alture
Di ghjustizia spruvista o prudibita
Induv’ellu si campanu vite dure

Arritu è sodu tene l’ochji chjari
A mezu à l’affluenza accresciuta
E so figliole, i so figlioli cari
Cun l’idea di nazione risuluta

Quallà l’esiliu amaru urfanellu
S’hà purtatu i primi fochi picciati
S’hè richjosu oramai lu purtellu
Per parechj’anni destini ruvinati

Ma ferma pace decisa per ritornu
In ogni mente chì s’apre sunniata
Vultà, nasce torna è sunnà lu cornu
Chì purterà demucrazia garbata

In cima d’un maghju pisatu in furia
Sventuleghja quindi à ogni buriana
Un pezzu di stofa ch’ùn teme l’ingiuria
A bandera biancumora chì briona

Si compie à fiatu l’ultima strufata
D’un omu passione è mai dumatu
Sciaccamaneghjanu à santa cruciata
Sacrifizii, lotte, nimu ùn s’hè surdatu

Giovani, vechji si face u rispettu
Sò di tutti i paesi, tutti i nomi
Quellu chì mantene un palmu di nettu
Sente a voce d’Emondu Simeoni