In stu primu rumanzu carcu di emozione cuntenuta, Pasquale Baldovini evoca un avvenimentu tragicu in a vita studientina curtinese. Un sguardu sensibile, senza moralisimu, ispiratu da fatti veri.

Da : Marianne Laliman 

Ci n’arricurderemu, Pasquale Baldovini, Albiana-Cullezzione Calamaii

À Michele ùn lu videremu guasi micca in u rumanzu, eppuru -prestu a capimu- ghjè a storia di a so morte chì ci hè cuntata. Ma ne feremu una scuperta prugressiva cù u sgardu di parechji persunaghji. Ognunu cù a so percezzione di u drama, ognunu cù a so crunologia. Maria è Francescu, dui parenti, un coppiu ordinariu chì hà da vede a so vita sprufundassi una mane cù una chjamata telefonica.

È po ci sò quelli chì c’eranu, quella notte. Quattru giuvanotti amichi di Michele. Tutti in piena vita studiantina è chì si truveranu senza circalla in core à una successione di fatti banali, ma chì cunducenu à una morte. A morte per nunda d’un giuvanottu senza storie. Inspiratu di fatti reali ch’avianu cummossu a Corsica in u 2010. Stu primu rumanzu di Pasquale Baldovini tratta dunque di un sugettu grave. Una scrittura efficace, spressiva ma misurata, mette in risaltu l’assurdità di sta morte.

Pesanu tantu nantu à l’anime

U racontu ammaestratu restituisce u corsu involuntariu ma ineluttabile versu a fine tragica. Ma, puru cù un tema chì puderia esse pisivu, l’autore chì mette in scena persunaghji custruiti, attuali, riprisentativi è attempu individualizati, riesce à prupone un sguardu più sensibile chè muralizatore nant’à stu tristu affare chì, da veru, ferma in e memorie.

Certe stonde sò cusì putente, pesanu tantu nantu à l’anime chì omu ùn pò mai cuntà le chjare. Fermanu in u chjaroscuru. Tuttu ci volta à l’arringuersciu, sottusopra. U sonu è e figure ùn s’appaghjanu più. A crunologia hè stracciata. Tandu, quelli chì e contanu ponu sembià o scemi o bugiardi à quelli chì stanu à sente. Perchè ogni testimunianza ùn s’assumiglia à l’astre. Perchè ogni testimoniu cambia versu secondu l’ora è a stagione.

Ci n’arricurderemu, Pasquale Baldovini, Albiana-Cullezzione Calamaii

Da leghje ancu : Qual’hè chì hà tombu à Gilac ?

Vous pouvez également aimer :

Laisser un commentaire

Votre adresse e-mail ne sera pas publiée. Les champs obligatoires sont indiqués avec *