Prufessore di lingua è cultura corsa, figura di punta di u Riacquistu, Ghjacumu Thiers publicheghja cù l’edizioni Albiana « Qual’hè chì hà tombu à Gilac ? » Un libru cù una trama originale è piena di misteru.

Par : Marianne Laliman

Qual’hè chì hà tombu à Gilac? hè statu publicatu di ghjugnu 2019. À certi l’hà da evucà qualcosa, a casata Gilac. À l’altri cum’è mè, ùn li dicerà nunda… Ma scuprendu l’ultimu rumanzu di Ghjacumu Thiers, indè Albiana, tutti averanu una risposta inaspittata.

Ci conta a storia d’un impresariu corsu (innò, ùn si chjama micca Gilac). Trà cuntinente è Corsica. Trà fiascu è riescita in dui settori assai sfarenti, a bivenda, cù un pruduttu inspiratu da u vinu Mariani, è u prufume. Si tratta di u so parcorsu, e so ambizione. Di e so cunvinzione da affirmà o da rilativisà è e so dillusione, i so amori.

Cù un suppulu di risa

U racontu hè custruitu cù una crunulugia schjattata è parechje voce intervenenu. Ogni puntu di vista purtendu a so propria : -è forse incumpletta- percezzione. A narrazione si permette scarti, piantate o digressione, autorizendu un sguardu nant’à i fatti è i cumpurtamenti. Sguardu à quandu analiticu, à quandu ironicu. È ancu, di tantu in tantu, sensibile è tenneru ma sempre cù un suppulu di risa. È cusì pò cunduce à cunsiderà, per indettu, u scambiamentu di modu di campà chì si piatta daretu à elementi urdinarii. Cum’è una simplice buttiglia di gasu, o un bacile mudernu. O à interrugassi nant’à un schema stereotipatu.

Cum’è spessu cù l’autore, Bastia trova a so piazza inde a storia. Tale un puntu fissu chì face affiurà a zitellina, u passatu. U pesu dia memoria, è tanti pezzi di ciò chì face una sucetà è una vita d’omu, cù i so lati boni è quelli neri.

Da leghje ancu : U Ingallaratu Santu Casta  

Infine, u racontu sviluppatu di sta manera inghjena una forma di cumplicità cù u lettore. Sin’à invitallu à a riflessione nant’à a scrittura stessa, i codici literarii, e scelte è a libertà di u scrittore.

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *