L’alivi, de Rinatu Coti


L’Alivi di li me loca
Vistuta di fronda verdi
A to tràmula m’alegra
Disgrazia à chì ti perdi
Di li sèculi antichi
Ci manteni li vistichi.

Chì ti cogli hè cuntenti
Di lu stantu chì li veni
U to fruttu hè divizia
Chì adolca tanti peni
À lu fronti di lu natu
Cù lu segnu distinatu.

Quandu Cristu s’appruntava
Ad andà à lu turmentu
S’arrimbava à l’alivi
È li purtava lu ventu
U spaventu più atroci
Chè lu legnu di la croci.

Quandu tù alivi dolci
Da la màcina sè franta
È ci dà tuttu lu suchju
Chì si sbarsa è si smanta
Lu to oru hè framanti
Lu to donu hè lampanti.

À lu pòvaru chì pienghji
Parchì pati caristìa
Nant’à un pezzu di pani
Sè sustanza d’aligrìa
È di tè faci lusingu
Di lu to priziosu pingu.

Oliu di l’alivi nosci
Da frighja è da cundiscia
Chì t’aprada si ni vanta
Di avè la peddi liscia
Curi ancu li malanni
Di la ghjenti di cent’anni.

Si ralègrani li morti
Quandu casca lu graneddu
Altu sìmbulu di paci
Hè pruvenda di l’aceddu
Chì insegna zifulendu
Chì si campa sempri dendu.

I paesa sò smurtiti
Ùn ferma più mulatteri
Ci hè più casi ch’è parsoni
Sò frusti li sunaglieri
Ma lu cori paisanu
Senti nascia lu so branu.

Rimuderna quiddu franghju
Cù l’amor di lu maestru
Chì la màcina righjira
Ricurdendu lu so estru
Quandu si senti cantà
A ghjenti ‘n u benistà.

O tù sè lu nosciu vittu
Sè lu sboccu naturali
Di la noscia terra amata
Di la pàtria carnali
Dundi sò in a so fossa
Di l’antichi tutti l’ossa.

Oghji corri pà li stretti
Una brama chì ci porta
Ad andà in l’alivetu
Chì l’alivi ùn hè morta
È la ràdica funduta
Da noialtri hè di valuta.

Chì la luna fuss’ à falcia
O furmessi una conca
Virdieghja lu frundamu
Ancu di la vetta tronca
A campa lu nosciu stintu
Ad avà mai s’hè spintu.

A virtù hè fior anticu
À ghjuvori di dumani
Com’a rama di l’alivi
Chì si carca pà li mani
Di la nostr’umanità
In cerca di dignità.

Réédition d’un poème, première publication Musanostra en 2011

Laisser un commentaire

Votre adresse de messagerie ne sera pas publiée. Les champs obligatoires sont indiqués avec *