« Un terramottu in a literatura corsa”

par Sébastien Quenot

Da a guerra di u 14 à i mojitos di a Rambla in Barcelona, passendu per passate indiavulate à i comptoirs, l’ultimu rumanzu di Biancarelli hè una vera soma, un terramottu in a literatura corsa, the libru à ùn micca mancà !

Sta parabula d’una sucetà corsa post-muderna in pezzi, in pisticciuli, in panna, allupicata è loscia dopu a scossa di a francisazione è l’assaltu di a mundialisazione, presenta un intrecciu d’epiche è di tematiche chì sò tante chjave per capisce u sguardu ch’ellu porta l’autore nant’à a Corsica. U versu trash di l’opera ùn cerca micca a pruvucazione à tutti i patti. À u cuntrariu, a descrizzione d’una sucetà persunalizata in a figura di Mansuetu è di l’imaginariu di e brame nustrale ind’è Cianfarani o Maroselli sò tante vie duve à dilla franca, u lettore, ancu in e so pazzie, si pò ritruvà…

Sta parabula d’una sucetà corsa chì intoppa una mundialisazione viulente, inghjenna un umanisimu paisanu ma cusmupulitu dinù.

U risultatu hè tremendu, incù una lingua senza pastoghje, incù unalibertà di tonu è di parolla bella ammaestrata, Biancarelli hà scrittu ciò chì firmerà per avà, l’opera maestra di a so generazione. Cun d’altri autori o artisti chì viaghjanu trà sintimu d’abandonnu, di sparizione, nihilisimu fintu, indiatura palesa ma libera è vuluntà di nurmalizà, di mudernizà a lingua, nun solu l’equilibriu vene d’incantu trà tutte ste tentazione, ma sopratuttu, cù stu libru, passerete una bella stonda di piacè. È quessa pò, hè digià una bella vittoria chì in Corsica dinù, malgratu u chjoccu seccu di u Murtoriu, the show must go on !”

Prima edizione Musanostra , marzu 2011

Laisser un commentaire

Votre adresse e-mail ne sera pas publiée. Les champs obligatoires sont indiqués avec *